प्यूठान । राज्यले नीतिगत रुपमा उद्योगी व्यवसायीहरुको समस्या समाधान गर्नुपर्ने प्यूठान उद्योग बाणिज्य संघले मन्त्रालयलाई सुझाव दिएको छ । उद्योग, वाणिज्य तथा आपूर्ति मन्त्रालयका वाणिज्य सचिव गोविन्द बहादुर कार्कीसँग मंगलबार विहान जिल्ला प्रशासन कार्यालय प्यूठानमा भएको अन्तरक्रिया कार्यक्रममा संघले विभिन्न सुझावहरु दिएको हो ।

उद्योगी व्यवसायीहरुका समस्या समाधानका लागि संघले दिएको सुझाबको कार्यान्वयन गर्नको लागि पहल गर्ने वाणिज्य सचिव कार्कीले बताउनुभयो । जिल्लाका उद्योगी व्यवसायीहरुका समस्या समाधान तथा नयाँ उद्योगहरुको स्थापना गर्न उद्योगी व्यवसायीहरु जागरुक हुन जरुरी र आवश्यक नितिगत व्यवस्थाहरुको सहजिकरण गर्नको लागि सचिवको महत्वपूर्ण भुमिका रहने प्रमुख जिल्ला अधिकारी रमा आचार्य (सुवेदी) बताउनुभयो ।

प्यूठान जिल्लामा उद्योगी व्यवसायीहरुको बर्तमान समस्या, चुनौति र समाधानका लागि मन्त्रालयबाट नितिगतरुपमा सुधार गर्नुपर्ने विषयहरुमा संघका अध्यक्ष सन्देश आचार्य, पूर्व अध्यक्ष इमान सिंह भारती, बरिष्ठ उपाध्यक्ष कृष्ण भक्त गिरी, महासचिव झवेन्द्र शर्मा लगायतले आफ्नो धारणा राख्नुभएको थियो ।

कार्यक्रममा गौमुखी गाउँपालिका अध्यक्ष विष्णु कुमार गिरी, सुरक्षा निकायका प्रमुख, उद्योग वाणिज्य संघका पदाधिकारी तथा कार्यसमितिहरुको उपस्थिति रहेको थियो । कार्यक्रमको संचालन प्रशासन कार्यालयका प्रशासकीय अधिकृत जालन्धर भुसालले गर्नुभएको थियो ।